Innlend hlutabréfaeign lífeyrissjóðanna rýrnaði um 88%

Greining Glitnis segir að það veki litla undrun að af einstökum eignum lífeyrissjóðanna er það eign þeirra í innlendum hlutabréfum sem hefur tekið hvað mestum breytingum frá hruni bankanna. Eign þessi stóð í 239 milljörðum kr. í upphafi síðastliðins árs en var komin niður í tæplega 30 milljarða í lok árs. Lækkunin er 209 milljarða kr. eða 88%.

Einnig er talsverð lækkun á eign sjóðanna í innlendum verðbréfasjóðum en sú eign fer úr 149 milljörðum kr. í upphafi síðastliðins ár niður í 124 milljarða kr. í lok árs. Lækkunin er 17%. Þá rýrna einnig eignir sjóðanna í skuldabréfum bankanna en þær lækkuðu um tæplega 14% á tímabilinu.

Fjallað er um stöðu lífeyrissjóðanna í Morgunkorni greiningarinnar. Þar segir að hrein eign lífeyrissjóðanna til greiðslu lífeyris var 1.658 milljarða kr. í lok árs í fyrra og hafði þá lækkað um 10% frá hruni bankanna en í lok september síðastliðins var eign þessi 1.839 milljarðar kr.

Þrátt fyrir rýrnunina eru eignirnar viðlíka því sem þær voru í upphafi síðastliðins árs en þá voru þær 1.697 milljarða kr. og hafa þær því ekki rýrnað nema um ríflega 2% á tímabilinu að nafnverði. Hins vegar hefur verðbólga verið umtalsverð á tímabilinu og þegar það er reiknað inn í hafa eignir sjóðanna rýrnað að raunvirði um ríflega 20%.

Seðlabankinn segir að enn sé nokkur óvissa um endanlegt mat á eignum lífeyrissjóðanna. Líklegt er að sú óvissa sé til lækkunar á hreinni eign þeirra til greiðslu lífeyris. Skerðing á lífeyrisréttindum blasir því við, hjá sumum sjóðanna að minnsta kosti. Skerðing verður ekki hjá lífeyrissjóðum opinberra starfsmanna en sjóðir þeirra sem starfa á almennum vinnumarkaði munu eflaust margir þurfa að skerða réttindin.