Vonast til að halda Beckham lengur

Forráðamenn ítalska stórliðsins AC Milan eru vongóðir um að halda David Beckham lengur en þessa tvo mánuði sem lánssamningur hans segir til um. Beckham var í byrjunarliði AC Milan í 2-2 jafnteflisleik gegn Roma.

Mikil ánægja er með frammistöðu Beckham síðan hann kom til liðsins. „Hann gefur liðinu mikið og við erum ánægðir með hann. Við erum með hann á tveggja mánaða lánssamningi en allt er mögulegt og hann gæti verið lengur hjá okkur," sagði Leonardo, stjórnarmaður hjá AC Milan.

Beckham er samningsbundinn LA Galaxy í Bandaríkjunum eins og flestir vita. Tímabilið 2009 í MLS deildinni fer af stað 19. mars en LA Galaxy á fyrsta leik gegn DC United þann 22. mars.

„Við héldum að hann gæti bara leikið 45-60 mínútur en hann lék nánast allan leikinn og gerði góða hluti. Hann er í mjög góðu formi. Það er erfitt að leika gegn Roma í fyrsta leik en hann hljóp, varðist vel og barðist. Hann er fljótur að aðlagast," sagði Leonardo.

Milan er í þriðja sæti ítölsku deildarinnar, níu stigum á eftir Inter sem trjónir á toppnum.