Karlmaður í lífshættu eftir misþyrmingar

Tæplega þrítugur litháískur karlmaður slasaðist lífshættulega um miðjan dag í gær þegar til átaka kom í húsi við Grettisgötu í Reykjavík. Sex manns voru handteknir í kjölfarið, fjórir karlmenn og tvær konur.

Fólkið er allt af erlendu bergi brotið en hefur verið búsett hér á landi um hríð.

Eftir því sem næst verður komist brutust átökin út fyrri hluta dags í gær. Um eittleytið var lögreglan kvödd á staðinn og reyndist einn þeirra sem var á staðnum illa særður eftir átökin. Ekki er ljóst hvort áverkarnir voru eftir högg og spörk einungis eða eggvopn og barefli einnig.

Íbúi í húsinu sem Fréttablaðið ræddi við í gær sagði að þar byggi nú hópur fólks, einkum frá Austur-Evrópu, sem hefði misst vinnuna en lifði á atvinnuleysisbótum. Mikið væri um áfengis­neyslu á staðnum jafnt daga sem nætur.

Samkvæmt upplýsingum Fréttablaðsins var fólkið sem handtekið var frá Litháen og Póllandi. Hinn yngsti hinna handteknu er á þrítugsaldri en sá elsti á fimmtugsaldri. Flest er fólkið búsett í umræddu húsi.

Í dag verður tekin ákvörðun um hvort farið verður fram á gæsluvarðhald yfir einhverjum þeirra sem inni sitja eða þeim sleppt að loknum yfirheyrslum. Maðurinn sem særðist fór beint í aðgerð á Landspítalanum í gær, þar sem gert var að sárum hans. Tvísýnt var um líf hans í gærkvöld þegar blaðið fór í prentun.