Velta fyrirtækja hefur minnkað um 17,6% að raunvirðim milli ára

Velta fyrirtækja hér á landi dróst saman um 7,7% að nafnvirði og 17,6% að raunvirði á milli ára samkvæmt gögnum sem Hagstofan vinnur upp úr virðisaukaskattsskýrslum fyrir tímabilið maí til júní.

Hagfræðideild Landsbankans fjallar um málið í Hagsjá sinni. Þar segir að m.v. raungildi hefur veltan ekki verið svo lítil á tímabilinu síðan árið 2005. Undanfarin ár hefur þetta tímabil verið veltumest en fyrir það var síðasta virðisaukatímabil ársins það veltumesta.

Þessar tölur eru á svipuðu róli og aðrar sem mæla umsvif í hagkerfinu og breytta neysluhegðun. Til að mynda sýna tölur Seðlabankans um greiðslukortaveltu að hún dróst saman um tæp 19% frá ágúst 2008 til ágúst 2009 á föstu verði. Hún hefur ekki verið jafnlítil síðan í ársbyrjun 2004.