Tæpur helmingur gjaldeyrisforða SÍ eru skammtímalán

Tæplega helmingur af gjaldeyrisforða Seðlabanka Íslands (SÍ) eru skammtímalán sem munu gjaldfalla á næstu 30 dögum. Þetta kemur fram í yfirliti sem bankinn hefur birt um stöðu gjaldeyrisforðans.

Samkvæmt yfirlitinu eru þessi skammtímalán samtals um 180 milljarðar kr. sem bankinn þarf að endurnýja á næstu 30 dögum til að viðhalda stöðu forðans sem nú stendur í 364 milljörðum kr..

Á undanförnum mánuðum hefur Seðlabankinn verið að velta þessari upphæð á undan sér, þ.e. með því að taka önnur skammtímalán á móti þeim sem hann þarf að greiða í hverjum mánuði.

Til samanburðar má geta þess að fyrir maí í fyrra voru þessi skammtímalán um 20-25% hlutfall af heildargjaldeyrisforðanum.

Fram kemur í yfirliti Seðlabankans að gjaldeyrisvaraforðinn rýrnaði um 65 milljarða kr. í janúar. Skýrist það að mestu af því að gengi krónunnar gagnvart evru var 16% sterkara í lok janúar en í lok desember á síðasta ári.