Ólíklegt að Björgólfur Thor hagnist mikið á sölu Actavis

Reuters-fréttastofan segir í dag að skriður sé kominn á hugsanlega sölu Actavis en fregnir um söluna hafa verið á sveimi frá því í október á síðasta ári. Þrátt fyrir verðmiða upp á 6 milljarða dollara, eða vel yfir 700 milljarða kr. er ólíklegt að Björgólfur Thor Björgólfsson hagnist mikið á sölunni.

Björgólfur Thor á 80% af Actavis í gegnum félag sitt Novator en hann keypti Actavis fyrir 18 mánuðum síðan. Kaupin gerðu það að verkum að Actavis stóð uppi með skuld við Deutche Bank upp á 5,4 milljarða dollara eða svipaða upphæð og verðmiðinn er á félaginu samkvæmt Reuters.

Einn af heimildarmönnum Reuters segir að stóra spurningin sé hve Actavis sé mikils virði að skuldunum frádregnum.

Fram kemur að nokkrir áhugasamir kaupendur séu til staðar. Nefnir Reuters sem dæmi Pfizer, Sanofi-Aventis, Novartis og GlaxoSmithKline. Þar að auki munu nokkrir fjárfestingarsjóðir í Asíu hafa áhuga á kaupunum.

Merrill Lynch var ráðið í fyrra til þess að annast ráðgjöf við söluna á Actavis. Setja átti félagið í sölumeðferð fyrir áramótin en þá setti Merckle-fjölskyldan þýska strik í reikninginn með því að setja sitt samheitalyfjafélag Ratiopharm GmbH á markaðinn. Greint var frá því máli á visir.is í nóvember.