Glitnir og Landsbanki: Ný skipurit sama fólk

Kröfur hafa verið um að stokkað verði upp í lykilstöðum í nýju ríkisbönkunum og hefur það verið harðlega gagnrýnt að sama fólkið gegni sömu stöðum fyrir og eftir hrun.

Finnur Sveinbjörnsson, bankastjóri Kaupþings, hefur gengið hvað harðast fram í skilum milli nýja og gamla Kaupþings með því að segja upp nokkrum af lykilstarfsmönnum bankans. Til slíkra skila hefur ekki komið í nýja Glitni og Landsbanka.

Þó að töluverðar breytingar hafi orðið á skipuriti Landsbankans þá er í flestum tilvikum um að ræða tilfærslu í starfi. Framkvæmdastjóra rekstrarsviðs var vikið úr starfi í tengslum við rannsókn á 100 milljóna króna millifærslu inn á hans persónulega reikning. Þá hafa framkvæmdastjórar einkabanka, eignastýringar og alþjóðasviðs hætt störfum og sviðin verið lögð niður.

Ársæll Hafsteinsson var framkvæmdastjóri lögfræðisviðs og bar ábyrgð á lánaeftirliti situr nú í skilanefnd gamla Landsbankans. Elín Sigfúsdóttir, bankastjóri Nýja Landsbankans, mun láta af störfum í bankanum en hún var áður framkvæmdastjóri fyrirtækjasviðs. Aðrir fyrrum framkvæmdastjórar eru enn að störfum í nýja Landsbankanum og eru flestir hluti af hinni svokölluðu grænu byltingu sem kom með Sigurjóni Árnasyni úr Búnaðarbankanum í Landsbankann.

Á gamla skipuriti Glitins má sjá að miklar breytingar urðu þegar Lárus Welding, fyrrverandi forstjóri Glitnis, réði inn 6 nýja framkvæmdastjóra í maí í fyrra. Á þeim tíma var unnið að því að minnka efnahagsreikning bankans.

Af þeim er einn hættur störfum, framkvæmdastjóri eignastýringar. Tveir eru nú forstöðumenn en þrír eru enn framkvæmdastjórar hjá nýja Glitni. Að auki hafa þrír nýir framkvæmdastjórar verið ráðnir. Til viðbótar við framkvæmdastjóranna má nefna að Guðrún Gunnarsdóttir sem var forstöðumaður lánaeftirlits gamla Glitnis og bar ábyrgð á að lánareglum væri fylgt eftir gegnir sama starfi hjá Nýja Glitni.