Fyrrverandi stjórnarmenn í Glitni ætla að áfrýja

Fyrrverandi stjórnarmenn Glitnis hafa sent frá sér tilkynningu þess efnis að þeir muni áfrýja til Hæstaréttar dómi Héraðsdóms Reykjavíkur í máli Vilhjálms Bjarnasonar gegn stjórninni vegna kaupa Glitnis á hlutabréfum Bjarna Ármannssonar í apríl 2007. Héraðsdómur komst í dag að þeirri niðurstöðu að greiða ætti Vilhjálmi, sem var hluthafi í bankanum, um tvær milljónir króna í skaðabætur.

Málið er talið fordæmisgefandi og sagðist Vilhjálmur áætla í samtali við Vísi í dag að stjórnarmennirnir gætu þurft að greiða alls 35 milljarða í skaðabætur til hluthafa bankans.

„Við teljum niðurstöðu Héraðsdóms í grundvallaratriðum ranga og ekki í samræmi við þær réttarreglur sem gilda á sviði félaga- og skaðabótaréttar," segir í yfirlýsingu stjórnarmannana fyrrvernadi. „Kaup bankans á umræddum hlutabréfum voru að auki innan samþykkta hluthafafundar bankans.

Við erum þess fullviss að dómnum verður hnekkt í Hæstirétti," segir einnig.

Stjórn Gliltnis skipuðu á þessum tíma þau Þorsteinn M. Jónsson, Björn Ingi Sveinsson, Haukur Guðjónsson, Jón Sigurðsson, Katrín Pétursdóttir, Pétur Guðmundsson og Skarphéðinn Berg Steinarsson.