Fjöldi eignaskipta innan sömu fjölskyldu hefur þrefaldast

Frá því í byrjun október þegar íslenska bankakerfið hrundi og fram til síðustu mánaðarmóta hafa eignaskipti á eign eða eignahluta innan sömu fjölskyldu þrefaldast.

Greining Glitnis fjallar um málið í Morgunkorni sínui. Þar segir að veruleg aukning varð eftir hrun bankanna á fjölda fasteigna þar sem eigendaskipti á eign eða eignahluta fór fram innan sömu fjölskyldu.

Með fjölskyldu er átt við hjón eða sambúðarfólk og ólögráða börn þeirra. Á þeim fjórum mánuðum sem liðnir eru frá hruni bankanna hafa 384 fasteignir þannig skipt um eigendur samanborið við 115 á sama tímabili árinu áður. Kemur þetta fram í tölum sem Fasteignaskrá Íslands hefur birt.

Eins og kunnugt er af fréttum hafa fjölmiðlar birt upplýsingar um að fyrrum starfsmenn í bönkunum þremur hafa í nokkrum mæli skráð húseignir sínar á eiginkonur eða skyldmenni.

Samkvæmt fyrrgreindum tölum virðist þetta vera mun útbreiddara og ekki aðeins bundið við fyrrverandi bankastarfsmenn.