Saga Capital semur við IFS ráðgjöf

Saga Capital Fjárfestingarbanki hefur samið við IFS Ráðgjöf um að fyrirtækið sinni ráðgjafa- og greiningavinnu fyrir bankann um stöðu og þróun efnahags- og markaðsmála.

Um er að ræða ítarlegar rannsóknir og skýrslur um alla þætti efnahagslífsins, bæði fyrir Ísland og umheiminn, sem og sértæka greiningu á hlutabréfa-, skuldabréfa- og gjaldeyrismarkaði.

Með samningnum er Saga Capital að tryggja sér aðgang að faglegri og hlutlausri greiningarvinnu en bankinn telur mjög mikilvægt að slík rannsóknarvinna sé unnin af hlutlausum aðilum þannig að aldrei vakni efasemdir um hugsanleg hagsmunatengsl.

Jón Óttar Birgisson, framkvæmdastjóri Viðskiptaþróunar hjá Saga Capital segir í tilkynningu um málið að eftir ítarlega skoðun töldu þeir að bæði hag Saga Capital og viðskiptamanna þess væri best borgið með samvinnu við sérhæfðan og óháðan greiningaraðila.

„Hjá IFS Ráðgjöf vinnur sterkur hópur fólks með áralanga reynslu og því var ákveðið að ganga til samstarfs við þá," segir Jón Óttar.