Krónan hefur braggast nokkuð í vikunni

Krónan hefur sótt nokkuð í sig veðrið að nýju undanfarna viku og hefur hún ekki verið sterkari gagnvart evru síðan fyrir jól.

Greining Glitnis segir í Morgunkorni sínu að þessi þróun hljóti að vera yfirvöldum talsvert fagnaðarefni, enda er styrking krónu hryggjarstykki aðgerðaráætlunar stjórnvalda og Alþjóðagjaldeyrissjóðsins (AGS) um endurreisn hagkerfisins eftir þá kreppu sem skall á síðasta haust.

Fyrir hádegi stóð evran í 160,5 kr. og hafði lækkað um 2,7% frá opnun. Gengisvísitalan hefur lækkað um 2,6% frá opnun og er hún nú 211,3.



Undanfarna viku hefur krónan styrkst um 5% gagnvart evru, en um 4,6% miðað við gengisvísitölu. Evran hefur átt nokkuð undir högg að sækja gagnvart ýmsum helstu myntum á gjaldeyrismörkuðum að undanförnu, sem skýrir þennan mun.

Virðist sem líf hafi hlaupið í gjaldeyrismarkað á ný eftir tiltölulega viðburðasnauðan fyrri hluta janúarmánaðar. Verði framhald á þessari þróun er það til marks um að áætlun AGS og yfirvalda um að styðja við krónuna með samspili hafta, hárra stýrivaxta Seðlabankans og eflingar gjaldeyrisforðans sé tekin að skila árangri.