Setur 1.400 milljarða kr. verðmiða á Actavis

Financial Times setur 8 milljarða evra, eða tæplega 1.400 milljarða kr., verðmiða á Actavis. Eins og fram hefur komið í fréttum er Actavis nú til sölu en það er að mestu í eigu Björgólfs Thors Björgólfssonar í gegnum félag hans Novator.

Financial Times byggir verðhugmynd sína á áætlunum um nettó hagnað Actavis á þessu ári sem sagður er verða um 600 milljónir evra eða rúmlega 100 milljarðar kr..

Þetta er mun hærra verð en fram kom í frétt á Reuters um söluna í gærdag. Þar töldu sérfræðingar að verðmæti Actavis væri helmingi minna eða rúmlega 700 milljarðar kr.. Var borið við að markaðsaðstæður gerðu söluna erfiða.

Samkvæmt umfjöllun Financial Times er mikill áhugi fyrir kaupum á Actavis. Fyrir utan nokkur af stærstu lyfjarisum heimsins hafa fjárfestingarsjóðir í Arabalöndum og Asíu einnig áhuga á félaginu.

Finnancial Times telur að gengið verði frá sölunni í maí en söluferlið sem hófst s.l. haust var sett í salt meðan að deila Actavis við Matvælaeftirlit Bandaríkjanna um verksmiðjur félagsins í New Jersey stóð sem hæst. Samningar hafa nú náðst í þeirri deilu.