Muntari ánægður hjá Inter - ekkert heyrt frá Tottenham

Miðjumaðurinn Sulley Muntari hjá Inter hefur þverneitað því að hann sé á förum frá félaginu en leikmaðurinn hefur verið sterklega orðaður við endurkomu í enska boltann þegar félagaskiptaglugginn í janúar opnar. Tottenham er á meðal þeirra félaga sem hafa verið orðuð við fyrrum leikmann Portsmouth.

„Ég hef í sannleika sagt ekkert heyrt af þessum orðrómum og hef engan áhuga á þeim. Ég er leikmaður Inter og einbeiti mér bara að því að standa mig fyrir félagið. Það er því tilgangslaust að vera að tala um önnur félög.

Ég hef verið spurður hvort ég hafi áhuga á því að snúa aftur til Englands en svarið mitt er að ég er búinn að koma mér mjög vel fyrir á Ítalíu," segir Muntari í viðtali við Sky Sports fréttastofuna.