Birgitta: Veit ekki hvort Þráinn er enn í flokksliðinu

„Ég hreinlega veit það ekki," segir Birgitta Jónsdóttir, þingmaður Borgarahreyfingarinnar, aðspurð hvort Þráinn Bertelsson hafi klofið sig úr flokksliðinu.

„Ég ætla bara að leyfa þessu að vera í friði yfir sumarþingið og svo sjáum við hvernig fer í haust."

Eins og fram kom í Fréttablaðinu í morgun segist Þráinn ekki hafa verið í neinum samskiptum við flokkssystkin sín eftir að þau kusu gegn Evrópusambandsaðild og segir ekki mark takandi á þeim, þau líti á alla sem fáráðlinga nema sig.

Birgitta segir Þráin ekki hafa mætt á þingflokksfundi síðan atkvæðagreiðsla um ESB átti sér stað. Hinir þingmenn hreyfingarinnar hafi hins vegar oft boðið honum að hitta sig og það boð standi.

„Það væri mjög gagnlegt fyrir hann að hitta okkur og fara yfir Icesave málið og fleira," segir Birgitta.

Aðspurð hvernig flokksmönnum líði eftir skammir Þráins segir Birgitta:

„Ég get ekki svarað fyrir hina, en ég er með þykkan skráp. Ég tek þessu eins og frá manneskju sem er reið. Sjálf er ég fyrirgefandi manneskja svo ég mun ekki erfa þetta við hann."

Hún segist þó frekar kjósa að eiga samskipti við Þráin beint en í gegnum fjölmiðla.