KEA skilar 110 milljóna hagnaði á fyrri helmingi ársins

Hagnaður KEA fyrir reiknaða skatta nam 110 milljónum króna á fyrri árshelmingi ársins. Hagnaður tímabilsins eftir reiknaða skatta nam 93 milljónum króna.

Heildareignir félagsins nema 4,1 milljarði króna og er félagið nánast skuldlaust. Eigið fé var rúmir 3,9 milljarðar króna. Eiginfjárhlutfall var 96%. Þetta kemur fram á vefsíðu félagsins.

Halldór Jóhannsson framkvæmdastjóri segist sáttur við niðurstöðuna. „Við tókum hressilega niðurfærslu í síðasta ársuppgjöri með það að markmiði að sýna sem raunhæfasta stöðu félagsins eftir þær hamfarir sem hér hafa dunið yfir. Rekstrarumgjörð fyrirtækja er enn mikilli óvissu háð en við teljum okkur hafa lagt nægjanlegt til hliðar," segir Halldór.

Ennfremur kemur fram í máli hans að afkoman tekur mið af því að reynt hefur verið að tryggja höfuðstól félagsins á kostnað ávöxtunar á meðan mesta óvissan líður hjá hvað varðar ýmsa þætti efnahagsmála og endurreisnar bankakerfisins. Lausafjárstaðan er mjög góð og efnahagslegur styrkleiki einnig.

„Við höfum aðlagað stefnu félagsins að breyttum aðstæðum á þann veg að nú leitar félagið að áhugaverðum fjárfestingakosti sem færir félagið að svokallaðari kjarnastarfsemi sem þýðir að meginstarfsemi félagsins verður á einu sviði eða í einni atvinnugrein," segir Halldór.