Mjótt á mununum í stjórnarkjöri Byrs

Nú fyrir stundu lauk kosningu til stjórnar á aðalfundi Byr sparisjóðs á Nordica-Hilton hótelinu en um 800 stofnfjáreigendur voru mættir á fundinn. Í framboði voru tveir listar. Annarsvegar var það A listinn sem leiddur var af Sveini Margeirssyni og Herði Arnarssyni en hann er talinn vera fulltrúi grasrótarinnar í stofnfjárhópnum. Hinsvegar var það B listinn sem leiddur var af Jóni KR. Sólnes og talinn fulltrúi þeirra sem farið hafa með völdin í Byr.

Mjótt var á mununum en B listinn fékk 48% greiddra atkvæða gegn 46% A listans. Þetta þýðir að B listinn fær þrjá menn í stjórn en A listinn einungis tvo.

Þetta þýðir að þeir sem farið hafa með völdin í BYR halda velli en mikil átök hafa verið innan sparisjóðsins sem endurspeglaðist í miklum átökum á fundinum sem hófst klukkan 16:00 í dag.

Það verða því þeir Jón Kr. Sólnes, Guðmundur Geir Gunnarsson og Matthías Björnsson sem verða í stjórn fyrir B listann og þeir Sveinn Margeirsson og Arnar Bjarnason fyrir A listann, en Arnar hefur verið nokkuð í fréttum undanfarið í tengslum við félag sitt Reykjavík Invest.

Í varastjórn voru kjörnir þeir Þorsteinn Ólafur Þorsteinsson fá B lista og Stefán Franklín fyrir A lista.

Í fréttatilkynningu frá Byr sem barst í kvöld segir að á fundinum hafi spunnist miklar umræður um hrun íslenska fjármálakerfisins sl. haust og afkomu Byrs á síðasta ári. Fram kom í ræðu Ragnars Z. Guðjónssonar sparisjóðsstjóra að rekstraráætlun Byrs fyrir árið 2009 geri ráð fyrir jákvæðri afkomu og að þrátt fyrir ágjöfina ætti Byr mikla möguleika til að ná fyrri styrk á næstu árum.  Hann sagði m.a.:

„Forsenda endurreisnar íslensks efnahagslífs er tilvist sjálfstæðra fjármálastofnana sem geta stutt við heimilin og fyrirtækin í landinu. Forsenda þess að Byr geti veitt samkeppnishæfa þjónustu og gætt hagsmuna viðskiptavina sinna, er að fyllsta jafnræðis sé gætt í öllum aðgerðum stjórnvalda við endurreisn íslensks fjármálakerfis. Virk samkeppni fjármálafyrirtækja með dreift eignarhald er forsenda þess að fjárhagur lands og þjóðar rísi á heilbrigðum grunni.“

Atkvæði í stjórnarkjöri greiddu 633 og 5,14% seðla voru auðir. Fundinn sátu fulltrúar 78% virkra atkvæða en stofnfjáreigendur í Byr sparisjóði eru 1.512 talsins.  Á fundinum var samþykkt að enginn arður yrði greiddur af stofnfé vegna síðasta árs og ekki nýtt heimild til endurmats stofnfjár samkvæmt 67. grein laga um fjármálafyrirtæki.