Laun Eimskipsforstjóra eru dæmalaus endaleysa

Vilhjálmur Bjarnason fjárfestir segir að launagreiðslur til forstjóra Eimskips séu dæmalaus endaleysa og algerlega út úr öllum kortum.

„Það liggur þar að auki ljóst fyrir að sá fyrsti þeirra skaðaði félagið stórlega á stuttum tíma sínum í forstjórastólnum," segir Vilhjálmur og á þar við Baldur Guðnason.

Eins og fram hefur komið í fréttum var Baldur Guðnason forstjóri Eimskips fyrstu 52 daga ársins og fékk 75 milljónir fyrir viðvikið. Það gerir rúmlega 1,4 milljón á dag.

Vilhjálmur segir að launagreiðslurnar til Eimskipsforstjóranna séu samt ekki fyrsta dæmið um ýmis ofurlaun í fjármálageiranum á síðasta ári. Laun sem voru í engu samræmi við árangur viðkomandi í starfi.