Mun meira af geitungum

Mun meira er af geitungum í sumar en í fyrrasumar. Þetta segir Erling Ólafsson skordýrafræðingur hjá Náttúrufræðistofnun Íslands.

„Menn héldu að það væri minna af geitungum í ár en það er langt í frá,“ segir hann. Hann segir það ekki rétt sem fram hafi komið í fjölmiðlum að svo virðist sem geitungar hafi tekið sig saman í kuldanum í vor og sameinað nokkur bú í eitt. „Geitungar kunna ekkert svoleiðis,“ segir Erling

Trjágeitungum hefur vegnað vel það sem af er sumri og allt að fjögur bú hafa fundist í einum og sama garðinum. Að sögn Erlings virðist það sama vera upp á teningnum hjá holugeitungum, en bú þeirra taka venjulega mestan vaxtarkipp í ágúst, en eru oft lítið sýnileg fram að þeim tíma. Tilkynningum til Náttúrufræðistofnunar um holugeitunga hefur fjölgað mikið strax á fyrstu dögum ágústmánaðar.

„Búin eru óvenjustór og þau hafa stækkað alveg ofboðslega hratt í góðu tíðinni sem var í júlí.“

Roðageitungur fannst í Kópavogi nú í byrjun ágúst en ekkert bú hefur fundist. Húsageitungs hefur ekki orðið vart í sumar, frekar en síðasta sumar. - þeb