Hrun Straums hefur víðtækar afleiðingar í Danmörku

Mikið er fjallað um yfirtöku Fjármálaeftirlitsins á Straumi í dönskum vefmiðlum þessa stundina. Á business.dk segir m.a. að hrun Straums muni hafa víðtækar afleiðingar í Danmörku.

Greint er frá því að Straumur hafi nýlega tekið við rekstri stórverslananna Magasin du Nord og Illum í Kaupmannahöfn. Þar að auki hafði Straumur s.l. haust tekið yfir rekstur húsgagnaverslunarkeðjunnar Biva.

Business.dk greinir einnig frá því að fyrir helgina hafi Straumur, í samvinnu við Köbstædernes Forsikring og Property Group, myndað fasteignafélagið Pecunia sem er ætlað að taka yfir eignir í vanskilum í samráði við banka sem eiga veð í þeim. Straumur er einn af stærstu eigendum Property Group.

Tekið er fram að Straumur reki skrifstofu í Kaupmannahöfn og hefur m.a. verið umfangsmikill í fjárfestingum fyrir hönd efnaðra Dana.