Afgangur á vöruskiptum skilar ekki sterkari krónu

Ljóst er að afgangur á vöruskiptum hefur ekki skilað sér að fullu inn á gjaldeyrismarkað. Þetta er áhyggjuefni þar sem ein helsta stoðin undir styrkingu krónunnar átti að vera sá viðsnúningur sem framundan er á vöruskiptum við útlönd.

Greining Glitnis fjallar um málið í Morgunkorni sínu. Þar segir að áætla megi eftir bráðbirgðatölum að afgangur á vöruskiptum í desember hafi numið 12 til 16 milljörðum kr. og hugsanlega enn hærri upphæð.

Greiningin segir að krónan átti á brattann að sækja í desembermánuði eftir mikla styrkingu fyrstu dagana eftir flot þegar líklegt er að gjaldeyrir sem safnast hafði upp á gjaldeyrisreikningum hafi streymt inn á markað.

„Það hlýtur að vera Seðlabanka og Alþjóðagjaldeyrissjóðnum nokkuð áhyggjuefni að jafn myndarlegur afgangur á utanríkisviðskiptum skuli ekki skila styrkingu krónu á hinum skilyrta gjaldeyrismarkaði," segir í Morgunkorninu. „Enn er þó of snemmt að kveða upp úr um hvort gjaldeyrishöftin nái tilgangi sínum eður ei, en línur í því efni skýrast á næstu vikum og mánuðum."