Yfirtakan á Straumi hefur ekki fjárhagsleg áhrif á ÍLS

Yfirtaka Fjármálaeftirlitsins á Straumi hefur ekki áhrif á fjárhagslega stöðu Íbúðalánasjóðs (ÍLS). Laust fé sjóðsins hefur einvörðungu verið ávaxtað á innlendum innlánsreikningum og með ríkisverðbréfum frá hruni bankanna í október síðastliðnum.

Í tilkynningu frá sjóðnum segir að samkvæmt yfirlýsingu ríkisstjórnar Íslands frá þeim tíma, eru innstæður í íslenskum bankastofnunum tryggðar að fullu. Samkvæmt neyðarlögum nr. 125/2008 eru innlán einnig forgangskröfur við gjaldþrotaskipti.

Íbúðalánasjóði er, samkvæmt útgefinni áhættu- og fjárstýringarstefnu sjóðsins, skylt að hafa yfir að ráða lausu fé sem nemur að lágmarki áætluðum nettó útlánum í þrjá mánuði og afborgunum af lánum sjóðsins sex mánuði fram í tímann. Þetta fé nemur nú alls um fjörutíu milljörðum króna.

Þetta lausafé ávaxtar Íbúðalánasjóður á innlánsreikningum hjá fjármálastofnunum, með ríkisverðbréfum eða í Seðlabanka Íslands. Hluti þessa fjár hefur verið ávaxtað í innlánum hjá Straumi. Með góðri lausafjárstöðu Íbúðalánasjóðs er tryggt að hann geti veitt lán til íbúðarkaupenda og mætt afborgunum af skuldum sínum í ákveðinn tíma án þess að þurfa að sækja nýtt lánsfé út á markaðinn.