Vefur Kaupþings valinn með 10 bestu í heiminum

Hið virta bandaríska fyrirtæki, Nielsen Norman Group sem sérhæfir sig í rannsóknum og ráðgjöf á sviði notendahæfis og notendaviðmóts vöru, þjónustu, hugbúnaðar og vefja, hefur valið innrivef Kaupþings sem einn af 10 bestu í heiminum árið 2009.

Í frétt um málið frá Kaupþingi segir að í umsögn, sem fylgir með viðurkenningunni, segir Jakob Nielsen, nothæfissérfræðingur, yfirmaður og einn af stofnendum Nielsen Norman Group m.a.: „Hjá Kaupþingi hefur verið byggt upp gott vinnuumhverfi og greiðar sam­skiptaleiðir innan bankans og samtímis hefur verið lögð áhersla á að taka tillit til og ná með persónulegum hætti til allra starfsmanna bankans.

Niðurstaða Nielsen Norman Group felur í sér mikla viðurkenningu fyrir Kaupþing og staðfestir enn og aftur að vefir Kaupþings banka eru á heimsmælikvarða og meðal hinna bestu. Meðal fyrirtækja sem fengu viðurkenningu í ár auk Kaupþings má nefna Deloitte & Touche Tohmatsu, HSBC Bank í Brasilíu, þýska fyrirtækið BASF SE og bandaríska örgjörvaframleið­andann Advanced Micro Devices.