ÍLS kaupir 20 milljarða kr. af íbúðalánum af SPRON

Viðræður við Íbúðalánasjóð (ÍLS) um sölu á hluta af íbúðalánum SPRON að verðmæti 20 milljarða króna eru á lokastigi.

Í tilkynningu um málið segir að lánin verða seld á bókfærðu verði og fær SPRON greitt 80% af andvirði lánanna strax en 20% þeirra greiðast síðar.

Sala íbúðalánanna hefur engin áhrif á eiginfjárstöðu SPRON en markmiðið með sölunni er að renna traustari stoðum undir lausafjárstöðu félagsins. Heildarútlán SPRON við níu mánaða uppgjör félagsins árið 2008 námu 206,5 milljörðum króna.

Lánin sem um ræðir eru innlend íbúðalán og hefur sala þeirra til Íbúðalánasjóðs engin áhrif á lántakendur þar sem SPRON mun annast alla umsýslu þeirra eins og áður.