Lítil starfsreynsla í bönkum og sparisjóðum

Nær helmingur starfsmanna í bönkum og sparisjóðum hafði fimm ára starfsreynslu eða minna. Um 20% hafði unnið þar í tvö ár eða minna. Þá voru karlar að jafnaði með um 40% hærri laun innan bankastofnanna en konur. Þetta kemur fram í kjarakönnun sem Capacent vann fyrir samtök starfsmanna fjármálastofnanna og greint er frá í Morgunblaðinu í dag.

Friðbert Traustason, framkvæmdastjóri Samtaka starfsmanna fjármálafyrirtækja segir ljóst að reynsluleysið hafi haft áhrif. Þeir sem hafi stjórnað mikilvægum þáttum innan bankanna hafi að mestu verið ungir karlmenn. Þó þeir hafi verið vel skólaðir hafi þeir verið reynslulausir.

Þá fullyrðir Friðbert að ofurlaunin í bönkunum hafi ratað í vasa fárra, eða innan við fimm prósent starfsmanna bankanna.