Sátt að nást um eignarhaldsfélagið

Allgóð sátt hefur náðst um frumvarp um eignaumsýslufélag ríkisins í efnahags- og skattanefnd. Helst er deilt um hvernig stjórn félagsins skuli skipuð. Annarri umræðu um frumvarpið lauk á þingi í gær.

Frumvarpið hefur tekið nokkrum breytingum og félagið sem stofna á til færst í áttina að því að verða „ráðgjafar og samræmingarfélag," svo notuð séu orð Péturs Blöndals, þingmanns Sjálfstæðisflokks í umræðum þingsins í gær.

Helgi Hjörvar, formaður efnahags- og skattanefndar, kveðst mjög sáttur við hvernig til hafi tekist við að skapa sátt um frumvarpið, en málið vakti harðar deilur og viðbrögð þegar fyrst var við því hreyft að ríkið stofnaði sérstakt félag til að fara með eignarhald á „þjóðhagslega mikilvægum" fyrirtækjum. Í umræðum á þingi kom fram að í þingnefndinni væru menn orðnir nokkuð samstíga um málið og urðu margir til að hrósa bæði samstarfinu og verkstjórninni í nefndinni.

Helst er deilt um hvernig félaginu skuli skipuð stjórn, en fulltrúar Framsóknarflokksins í efnahags- og skattanefnd hafa gert athugasemdir við að ráðherra sé þar einráður. Fulltrúi Borgaraflokksins gerði einnig fyrirvara vegna þessa.

Helgi segir að farið verði yfir þetta mál í lokayfirferð nefndarinnar áður en frumvarpið fer aftur fyrir þingið og verður að lögum. „Ég býst við að við gefum okkur næstu viku til að ljúka umfjölluninni endanlega," segir hann.

Mats Josefsson, sænskur ráðgjafi forsætisráðuneytisins um endurreisn bankakerfisins, hreyfði fyrstur við hugmyndinni um eignaumsýslufélagið, en slík skipan gaf góða raun í bankakreppu í Svíþjóð. Helgi segist hafa látið þýða frumvarpsdrögin og bera þau undir Mats sem sé sáttur við þau eins og þau séu.