Situr uppi með rúmlega sex milljóna skuld vegna bílaláns

Fjögurra barna einstæð móðir situr uppi með rúmlega sex milljóna skuld eftir að hafa tekið bílalán. Bílinn hennar var tekinn upp í skuldina fyrir eina milljón. Umboðsmaður neytenda ætlar að ræða við forsvarsmenn bílafjármögnunarfyrirtækja.

Í gær sögðum við frá því hvaða leiðum bílafjármögnunarfyritæki beita til þess að lækka verð á bifreiðum þeirra sem lenda í vanskilum og þurfa að skila inn lyklunum. Dæmið sem við tókum í gær var af SP fjármögnun. Lítum nú á dæmi frá Avant. Einstæð fjögurra barna móðir keypti sér bíl á þrjá milljónir árið 2007. Hún fékk 100 % lán í myntkörfu. Í september 2008 réð hún ekki lengur við afborganirnar og fór með bílinn til Avant í von um að geta samið um skuldina. Skömmu síðar kom uppgjörið.

Bílinn var nú metinn á 1800 þúsund. 300 þúsund var dregið frá í viðgerðarkostnað, 26 þúsund í ástandsskoðun, 15 í þrif, 270 þús í afföll, 78 þús í sölulaun, 15 í kostnað við uppgjör og 10 í geymslukostnað. Ofan á þetta allt saman bættist svo 308 þúsund krónur í lögfræðikostnað.

Nú er konan bíllaus en eftirstöðvarnar af bílaláninu samkvæmt uppgjöri þann 10. október í fyrra fimm milljónir. Síðan þá hefur skuldin við avant hækkað en meira og var í lok árs 2008 6 milljónir og 365 þúsund krónur.