Málstofa SÍ um endurskipulag skulda heimila og fyrirtækja

Málstofa um endurskipulagningu skulda heimila og fyrirtækja verður haldin á morgun 15. september kl. 15:00 í fundarsal Seðlabankans (SÍ), Sölvhóli.

Í frétt um málið á heimasíðu Seðlabankans segir að málshefjandi verður Þorvarður Tjörvi Ólafsson, hagfræðingur á hagfræðisviði Seðlabanka íslands. Erindi hans ber heitið „Endurskipulagning skulda heimila og fyrirtækja í kjölfar kerfislægrar fjármálakreppu".

Fram mun koma að endurskipulag skulda heimila og fyrirtækja eru meðal brýnustu en jafnframt vandasömustu úrlausnarefna sem lönd standa frammi fyrir í kjölfar kerfislægrar fjármálakreppu.

Á málstofunni verður fjallað um hvernig endurskipulagning skulda heimila og fyrirtækja gegnir lykilhlutverki í að skjóta styrkum stoðum undir efnahagsbata, lífvænlegt bankakerfi og samfélagslega sátt.

Tímasetning, mótun og framkvæmd slíkrar endurskipulagningar sé vandasöm og aðkomu ríkisins settar skorður af svigrúmi þess til að taka á sig auknar byrðar.

Fjallað verður um reynslu annarra landa af endurskipulagningu skulda heimila og fyrirtækja og hvaða lærdóma megi draga af henni fyrir Ísland. Málstofan byggir á væntanlegri grein í ritinu Efnahagsmál.