Kúrðu á kamrinum vegna óveðurs

Veður að Fjallabaki var með versta móti í nótt og hafði björgunarsveitin Suðurnes í nógu að snúast við að aðstoða fólk á hálendinu.

Í Landmannalaugum fuku stór tjöld og þurfti að flytja fólk í skjól í Landmannahelli og aðra skála á svæðinu. Sumir neyddust meira að segja til að leita skjóls á kömrum í Landmannalaugum og gistu þar.

Einnig þurfti að sækja tvö meidda göngumenn, annan við Ljótapoll og hinn við Hrafntinnusker, auk þess sem jepplingi var bjargað úr ánni í Landmannalaugum.

Björgunarsveitir sóttu einnig erlenda ferðamenn sem stöðvað höfðu bifreið sína á Herðubreiðarhálsi þar sem þeir þorðu ekki að aka lengra vegna veðurs. Þá þurftu björgunarsveitir að bjarga erlendu ferðafólki sem sat fast í bifreið í Hólmsá fyrir stundu.

Mikil úrkoma hefur verið að Fjallabaki og miklir vatnavextir í ám. Syðri Ófæra er nú sem beljandi fljót og ber nafn með rentu, samkvæmt upplýsingum frá slysavarnafélaginu Landsbjörg.

Landsbjörg beinir þeim tilmælum til ferðalanga að gæta ítrustu varkárni þegar ferðast er að Fjallabaki, sérstaklega þegar fara þarf yfir óbrúaðar ár og læki. Litlir lækir eru orðnir illfærir, jafnvel þokkalega búnum jeppabifreiðum.