Rabe ekki höfuðpaur í Papeyjarmálinu

Það tókst ekki að sýna fram á að Peter Rabe hefði skipulagt innflutning á fíkniefnum í svokölluðu Papeyjarmáli, segir lögmaður hans. Rabe hlaut 10 ára fangelsi í Héraðsdómi Reykjavíkur í morgun. Hann var handtekinn ásamt fimm Íslendingum í apríl síðastliðnum fyrir smygl á 109 kílóum af fíkniefnum. Í ákæru var honum gefið að sök að hafa skipulagt smyglið.

„Það var auðvitað gerð krafa um 12 ár. Og í niðurstöðu dómsins verður ráðið að ákæruvaldinu hafi ekki tekist að sýna fram á það sem þeir héldu alltaf fram að Rabe hefði verið skipuleggjandi innflutningsins. Hann var sýknaður af þeim þætti málsins," segir Ólafur Örn Svansson lögmaður Rabes. Ólafur bendir á að skjólstæðingur hans hafi krafist sýknu í málinu. Hann hefði hins vegar mátt búast við 10 ára fangelsi ef til sakfellingar kæmi.

Ólafur segir að fjórar vikur gefist til að taka ákvörðun um áfrýjun. „Og ef að það er áfrýjað, er ennþá undir í málinu spurning um það hvort íslenska ríkið hafi lögsögu yfir ákærða vegna þjóðréttarlegra skuldbindinga," segir Ólafur Örn.