Breytingar á stjórn Seðlabankans auka trúverðugleika bankans

Greining Glitnis telur að breytingar á stjórn Seðlabankans séu til þess fallnar að auka trúverðugleika Seðlabankans innan lands sem utan, en aukinn trúverðugleiki á íslensku fjármálakerfi er afar mikil vægur þáttur í endurreisn efnahagslífsins á komandi misserum.

Greining fjallar um nýtt frumvarp um breytingarnar í Morgunkorni sínu. Þar segir að aðkoma utanaðkomandi sérfræðinga er jákvætt skref í þessa átt, auk þess sem líklegt er að annað af þeim tveimur nefndarsætum sem ætlað er yfirmönnum bankans komi í hlut aðalhagfræðings bankans.

Ætti það að draga úr þeim mun sem á stundum hefur virst vera á skoðun bankastjórnar annars vegar, og fræðimanna bankans hins vegar, á framkvæmd peningastefnunnar undanfarin misseri.

Ákvarðanir um beitingu helstu stjórntækja Seðlabankans í peningamálum, þar á meðal stýrivaxta, verða framvegis í höndum fimm manna peningastefnunefndar. Slíkt fyrirkomulag tíðkast víða meðal seðlabanka og má þar nefna Noregsbanka, Englandsbanka og seðlabanka Japans.

Seðlabankastjóri verður formaður nefndarinnar en auk hans sitja tveir af yfirmönnum bankans á sviði peningamála í henni og tveir sérfræðingar sem seðlabankastjóri skipar að fenginni staðfestingu forsætisráðherra.

Er sérstaklega tekið fram í skýringum með frumvarpinu að seðlabankastjóri geti skipað utanaðkomandi sérfræðinga, erlenda jafnt sem innlenda, í þau tvö nefndarsæti sem ekki koma í hlut yfirmanna bankans.