Heildarútlán ÍLS minnka um 30% milli ára

Heildarútlán Íbúðalánasjóðs (ÍLS) fyrstu sex mánuði ársins voru um 17,4 milljarðar, en það eru um 30% minni útlán en á fyrstu sex mánuðum ársins 2008.

Alls lánaði sjóðurinn um 8 milljarða króna á öðrum ársfjórðungi, sem er um 15% minna en á fyrsta fjórðungi ársins.

Þetta kemur fram í mánaðarskýrslu sjóðsins. Þar segir að alls námu heildarútlán ÍLS rúmlega 2,6 milljörðum króna í júní. Þar af voru rúmir 1,9 milljarðar vegna almennra lána og rúmar 700 milljónir vegna leiguíbúðalána. Heildarútlán sjóðsins jukust því um tæp 3,6 % frá fyrri mánuði.

Meðalútlán almennra lána voru um 10,6 milljónir króna í júní, sem er aukning um 11% frá fyrri mánuði.

Heildarvelta íbúðabréfa í júní nam tæplega 75,3 milljörðum, sem er 17% meiri velta en í fyrri mánuði. Heildarvelta bréfanna nemur 407,8 milljörðum það sem af er árinu 2009.

Þann 16. júní hélt Íbúðalánasjóður fjórða útboð íbúðabréfa á árinu 2009. Alls bárust tilboð fyrir 12,195 milljarða að nafnverði. Ákveðið var að taka tilboðum að nafnverði 1,925 milljarða króna í HFF34 á meðalávöxtunarkröfunni 4,13% án þóknunar og 1,575 milljarða króna í HFF44 á meðalávöxtunarkröfunni 4,13% án þóknunar.

Útlánavextir sjóðsins lækkuðu um 0,1% í kjölfarið. Nýir vextir íbúðalána eru því 4,60% með uppgreiðsluákvæði og 5,10% án uppgreiðsluákvæðis. Vaxtaákvörðunin tók gildi 18. júní 2009.

Heildarvelta íbúðabréfa í júní nam tæplega 75,3 milljörðum, sem er 17% meiri velta en í fyrri mánuði. Heildarvelta bréfanna nemur 407,8 milljörðum það sem af er árinu 2009.