Áætlað tap Seðlabankans 42 milljarðar kr. í fyrra

Áætlað tap Seðlabanka Íslands á síðasta ári nemur 42 milljörðum kr.. Þetta kemur fram í efnahagsreikingi bankans sem birtur hefur verið á vefsíðu hans.

Síðustu mánuðir ársins 2008 voru mjög erfiðir í rekstri bankans eins og ítarlega hefur verið fjallað um í fjölmiðlum. Enda nam tapið af rekstri bankans tæplega 60 milljörðum kr. í desembermánuði.

Af öðrum tölum í efnahagsreikningi Seðlabankans má nefna að gengishagnaður bankans nam tæpum 40 milljörðum kr. á árinu og stóð gjaldeyrisforðinn í tæpum 430 milljörðum kr.. Hinsvegar hafði bankinn notað 77 milljarða kr. af forðanum í desember.

Þá átti bankinn kröfur á aðrar innlánsstofnanir upp á tæplega 465 milljarða kr. um áramótin. Þær voru upp á rúmlega 759 milljarða í lok nóvember s.l. en eins og komið hefur fram í fréttum tók ríkissjóður til sín 345 milljarða kr. af þeim í vikunni og setti á móti verðtryggt skuldabréf upp á 270 milljarða kr..