Veik staða krónunnar heldur stýrivöxtum háum

Meginástæða hárra stýrivaxta hér á landi er veik staða krónunnar og hin brýna þörf á að forða henni frá frekara hruni.

Greining Glitnis fjallar um málið í Morgunkorni sínu en athygli hefur vakið að meðan allar þjóðir í kringum okkur eru að lækka stýrivexti sína haldast þeir áfram háir á Íslandi.

Hagkerfið sjálft er að skreppa saman sem aldrei fyrr og verðbólgan framundan er lítil sem enginn ef krónan helst stöðug. Háir stýrivextir og gjaldeyrishöft eru því sá kostnaður sem þarf að greiða til að skapa gjaldmiðlinum eitthvað verðgildi og þó að undan þeim svíði sérstaklega, núna þegar enga erlenda fjármögnun er að fá, eru háir stýrivextir betri fyrir fyrirtæki og heimili í landinu en frekara fall krónunnar.

Staðan sýnir vel þann galla sem felst í núverandi fyrirkomulagi gengis- og peningamála hér á landi í glímunni við þau efnahagsvandræði sem við blasa.

Hvenær farið verður í stýrivaxtalækkun hér á landi fer að mati greiningarinar nær alfarið eftir því hvernig gengur að ná stöðugleika á gjaldeyrismarkaði og að fleyta krónunni á ný. Gangi það eftir sem stjórnvöld í samvinnu við Alþjóðagjaldeyrissjóðinn stefna að í þeim efnum er líklegt að fyrsta stýrivaxtalækkun ársins komi á vaxtaákvörðunardegi bankans 19. mars næstkomandi.

Náist þessi markmið í gengismálum mun verðbólgan hjaðna hratt á næstunni enda ekkert sem heldur henni uppi. Slaki hefur leyst af hólmi þenslu á vinnumarkaði á skömmum tíma og ef kjarasamningsbundnar hækkanir verða innan marka stöðugleika, líkt og líkur eru á, mun ekki koma mikill þrýstingar á verðlag frá þessari átt. Húsnæðisverð er einnig að lækka og mun það draga úr verðbólgunni. Þá er hrávöruverð á niðurleið sem og annar erlendur verðbólguþrýstingur.

Greining Glitnis reiknar með því að Seðlabankinn verði kominn með stýrivexti sína niður í 7% í lok árs.