FME yfirtekur rekstur Straums - forstjórinn segir af sér

Fjármálaeftirlitið (FME) hefur tekið ákvörðun um að taka yfir vald hluthafafundar Straums og vikið félagsstjórn í heild sinni frá störfum, ásamt því að skipa bankanum skilanefnd sem tekur við öllum heimildum stjórnar félagsins frá og með deginum í dag.

Skilanefndin skal fara með öll málefni Straums, hafa umsjón með allri meðferð eigna bankans og annast rekstur hans. Vegna þessa er bankinn lokaður.

Í framhaldi af þessu hefur William Fall forstjóri Straums ákveðið að segja af sér sem forstjóri Straums og tekur uppsögn hans gildi nú þegar.

Í tilkynningu um málið segir að þrátt fyrir sterkt eiginfjárhlutfall og það að bankanum hafi tekist að semja við lánadrottna sína um framlengingu lána, er fyrirséð að vegna bágrar lausafjárstöðu getur Straumur ekki haldið áfram reglulegri starfsemi.

Samkvæmt yfirlýsingu Ríkisstjórnar Íslands frá 6. október 2008 eru innistæður í íslenskum viðskiptabönkum tryggðar að fullu. Straumur hefur starfsleyfi sem viðskiptabanki og er aðili að Tryggingarsjóði innistæðueigenda og fjárfesta.