Ráðgjafar fjármálaráðuneytis Bretlands vissu um aðgerðina

Lárus Finnbogason formaður skilanefndar Landsbankans furðar sig á fréttum um að bresk stjórnvöld séu æf af reiði vegna beiðni um greiðslustöðvun hjá BG Holding ehf. „Ráðgjafar breska fjármálaráðuneytisins vissu af því sem til stóð og að við ætluðum í þessa aðgerð," segir Lárus.

Ráðgjafar þeir sem hér um ræðir eru Ernst & Young sem hafa haft eftirlit með Landsbankanum í London fyrir hönd breska fjármálaráðuneytisins undanfarna mánuði.

Lárusi kemur einnig á óvart fréttir um að þeir hafi verið boðaðir á fund í breska fjármálaráðuneytinu vegna málsins. Svo hafi alls ekki verið. Hinsvegar hafi skilanefndin átt símafund í morgun með fulltrúum fjármálaráðuneytisins.

Það hafi hinsvegar fyrir löngu verið búið að ákveða þann fund og raunar hafi hann frestast um nokkra daga.

Lárus vill taka það skýrt fram að sú leið sem valin var er sú besta til að tryggja hag kröfuhafa hjá Baugi, þar með talið breska ríkið. "Þess vegna skil ég ekki afhverju ráðmenn hér ættu að vera reiðir," segir Lárus en hann er nú staddur í London.