Aðeins 15-23% af kröfum Seðlabankans munu innheimtast

Á þessi stigi liggur ekki nákvæmlega fyrir hvað innheimtast kann af þeim bréfum sem fjármálaráðuneytið keypti af Seðlabankanum fyrr í mánuðinum. Í áætlunum fjármálaráðuneytisins er gert ráð fyrir að 50 - 80 milljarðar kr. muni innheimtast eða 15-22% af kröfunum.

Þetta kemur fram í vefriti ráðuneytisins. Ríkissjóður yfirtók í byrjun árs óvarin tryggingabréf vegna veð- og daglána Seðlabankans til innlendra fjármálastofnana að fjárhæð 345 milljarða kr. og greiddi fyrir með skuldabréfi útgefnu á Seðlabankann að fjárhæð 270 milljarða kr.

Við fall gömlu bankanna féllu á ríkissjóð ýmsar skuldbindingar sem hann þarf að taka á sig. Má þar m.a. nefna stofnfjár- og eiginfjárframlag inn í nýju bankana og yfirtöku ótryggra tryggingabréfa vegna veð- og daglána Seðlabanka og verðbréfalána til aðalmiðlara ríkissjóðs.

Áætlað er að eiginfjárframlag ríkissjóðs til nýju bankanna nemi 385 milljarðar kr. Ekki er gert ráð fyrir að fjármagna þurfi framlagið með því að sækja fé á markað heldur að ríkissjóður kaupi markaðshæf skuldabréf af Seðlabankanum og greiði fyrir þau með því að fella niður kröfu á Seðlabankann vegna áður veittra lána ríkissjóðs til styrkingar gjaldeyrisvaraforða Seðlabankans og með útgáfu skuldabréfs til bankans.

Fyrir liggur að fjármagna þarf fjárþörf ríkissjóðs á árinu á innlendum markaði. Áformað er að gera það með því að nýta 100 milljarða kr. af innistæðum ríkissjóðs í Seðlabanka ásamt því að gefa út markaðsskuldabréf umfram innlausn skulda á gjalddaga fyrir um 45 milljarða kr.

Á gjalddaga eru ríkisbréf fyrir um 71 milljarða kr. að nafnverði auk þess sem ráðgert er að innlausn ríkisvíxla umfram sölu nemi 29 milljörðum kr. Samtals eru því á innlausn 100 milljarðar kr. Ný útgáfa ríkisbréfa er því áætluð 145 milljarðar kr. Óbundnar innistæður ríkissjóðs í Seðlabanka Íslands námu um sl. áramót 172 milljarðar kr.