Meint sýndarviðskipti með hlutabréf í Kaupþingi í rannsókn

Meint sýndarviðskipti með hlutabréf í Kaupþingi upp á hátt í 40 milljarða króna eru í rannsókn hjá opinberum aðilum. Viðskipti Gertner-fjölskyldunnar bresku og Katarbúans Al-Thani eru stærstu málin en fjölmargir einstaklingar liggja undir grun.

Fjármálaeftirlitið hefur sent fjölmörg mál er varða markaðsmisnotkun og sýndarviðskipti til embættis sérstaks saksóknara. Slík brot geta varðað allt að sex ára fangelsi.

Tvö stór mál eru í rannsókn er varða Kaupþing. Í fyrsta lagi er um að ræða kaup sjeiksins Al-Thani frá Katar á fimm prósenta hlut í bankanum fyrir 25,5 milljarða, rétt fyrir bankahrun. Kaupþing lánaði Al-Thani fyrir kaupunum.

Þá er Fjármálaeftirlitið einnig að rannsaka kaup Gertner bræðranna Mendi og Moises á 2,5 prósenta hlut í bankanum í júní í fyrra fyrir um 14 milljarða króna. Samkvæmt heimildum snýr rannsóknin meðal annars að því hvort Kaupþing hafi lánað bræðrunum til kaupanna til að auka traust fjárfesta í blekkingarskyni.

Samtals er hér um að ræða hlutabréfaviðskipti fyrir um 40 milljarða.

Kaup Gertner bræðra á hlut í Kaupþingi eru einnig til skoðunar hjá Serious Fraud Office í Bretlandi sem eins og áður hefur verið greint frá á í samvinnu við sérstakan saksóknara bankahrunsins.

Eins og fréttastofa greindi frá í sumar hafa nokkrir aðilar fengið réttarstöðu grunaðs í rannsókninni. Sigurður Einarsson, fyrrverandi stjórnarformaður Kaupþings, Hreiðar Már Sigurðsson, fyrrverandi forstjóri bankans og Ólafur Ólafsson, einn stærsti hluthafinn, eru meðal þeirra.

Telma Halldórsdóttir, sem sat í stjórn Q Finance Holding, félags Al-Thani og Halldór Bjarkar Lúðvígsson, fyrrverandi starfsmaður hjá lánadeild Kaupþings eru á lista yfir grunaða. Halldór Bjarkar sýslar nú með norrænar eignir bankans fyrir hönd kröfuhafa. Líklegt þykir að Halldór fái stöðu vitnis.

Þá herma heimildir fréttastofu að fleiri einstaklingar séu grunaðir í tengslum við kaup Al-Thanis og Gertner bræðra á hlutabréfum í Kaupþingi.

Rannsóknaraðilar eru einnig að skoða meinta markaðsmisnotkun hjá Landsbankanum og Glitni. Rannsóknin á meintum sýndarviðskiptum með bréf í Kaupþingi mun vera lengst á veg komin og viðamest.