Nýfundin verk eftir Mozart leikin á hans eigin píanó

Mozart var undrabarn. Hann byrjaði að spila tónlist aðeins þriggja ára gamall og að semja tónverk fimm ára. Talið er að hann hafi verið sjö eða átta ára gamall þegar hann samdi verkin sem kynnt voru í dag.

Nóturnar eru með rithönd föður hans, Leopolds Mozart. Það er hinsvegar talið útilokað að hann hafi samið verkin því í þeim eru tónlistarleg mistök sem jafn þjálfaður og fágaður listamaður og hann var hefði aldrei gert.

Því er talið víst að hann hafi skrifað nóturnar upp úr því sem sonur hans lék. Austurríski tónlistarmaðurinn Florian Birsak lék verkin fyrir gesti á heimili Mozarts í dag á hans eigin píanó.

Þegar Mozart lést fimmta desember árið 1791 aðeins þrjátíu og fimm ára gamall hafði hann samið yfir 600 tónverk.