Íslendingar vantrúaðir á hlutirnir fari að lagast

Væntingar íslenskra neytenda til efnahags- og atvinnuástandsins eru litlar um þessar mundir. Væntingavísitala Gallup mælist nú 24.3 stig samkvæmt könnun sem birt var í morgun en Greining Glitnis segir frá könnuninni í morgunkorni sínu. Vísitalan er álíka lág og hún hefur verið síðustu fjóra mánuði eða frá hruni bankanna.

„Bendir það til þess að neytendur telji að ástandið hafi lítið sem ekkert skánað á þessu tímabili. Í september mældist vísitalan 76,2 stig og var því talsvert hærri en hún er nú. Hún hafði þó þá lækkað talsvert frá því sem hún náði hæst á góðæristímabilinu en á fyrri helmingi árs 2007 stóð vísitalan að meðaltali í 143,7 stigum," segir í morgunkorninu.

Þá er bent á að ríflega 93% svarenda telja að efnahagsástandið sé slæmt og 72% þeirra telja að atvinnumöguleikar séu litlir. 57% þeirra sem taka þátt telja að efnahagsástandið verði verra eftir sex mánuði og 49% þeirra að atvinnumöguleikarnir verði minni eftir þann tíma. Einnig telja 52% þeirra að heildartekjur þeirra muni lækka á næstu sex mánuðum.

Glitnismenn segja að svartsýni neytenda endurspeglist vel í neyslu þeirra og fjárfestingum um þessar munir. „Mikill samdráttur hefur þannig verið í kortaveltu undanfarið. Tölur um smásöluverslun segja svipaða sögu. Reikna má með að einkaneysla hafi dregist saman um u.þ.b. fimmtung á síðasta fjórðungi nýliðins árs og að samdrátturinn verði jafnvel enn meiri á fyrsta fjórðungi þessa árs. Samdrátturinn í fjárfestingum heimilanna er að líkindum enn meiri."

Það eru þó ekki einvörðungu íslenskir neytendur sem eru svartsýnir um þessar mundir. „Þannig náði bandaríska væntingavísitalan lægsta gildi sínu í 28 ár núna í febrúar. Einnig hafa væntingar neytenda um Evrópu nær alla minnkað umtalsvert undanfarið en útlit er fyrir að hinn alþjóðlega fjármálakreppa láti nær engan neytenda ósnertan."