Allir þurfa að færa fórnir fyrir bílaiðnaðinn

Allir sem hlut eiga að máli varðandi bílaiðnaðinn í Bandaríkjunum verða að færa fórnir til þess að þessi iðngrein geti náð fyrir styrk. Þetta sagði talsmaður Hvíta hússins í dag. „Allir hlutaðeigandi verða að gefa af sér til þess að nauðsynlegar endurbætur geti átt sér stað," sagði Robert Gibbs, talsmaður Hvíta hússins, á fréttamannafundi. Hann sagði að það væri skýr vilji Baracks Obama að styrkja bílaiðnaðinn. Líkt og fram hefur komið dróst bílasala í Bandaríkjunum saman um meira en 40% í febrúar og hefur ekki verið minni í næstum þrjá áratugi. Ef febrúarmánuður er meðtalinn hefur bílasala dregist saman í 15 mánuði samfleytt.

General Motors er haldið á floti með 13,4 milljarða dala láni frá stjórnvöldum og mun þurfa meira lán í þessum mánuði. Sala hjá þeim dróst saman um 53% í febrúar. Talsmenn GM segja að salan hafi ekki verið minni hjá þeim síðan 1967. Salan hjá Ford framleiðendunum dróst saman um 48% í febrúar, en Ford er talið standa best að bandarísku bílaframleiðendunum þremur.