Samkomulag um framtíð Íslandsbanka undirritað

Íslandsbanki, skilanefnd Glitnis, fyrir hönd kröfuhafa, og íslenska ríkið hafa undirritað samninga um uppgjör á milli gamla og nýja bankans og endurfjármögnun Íslandsbanka, að fram kemur í tilkynningu. Samkomulagið felur í sér að erlendir kröfuhafar geta eignast stærsta hluta Íslandsbanka.

Umræddir samningar byggja á því samkomulagi sem kynnt var 20. júlí og felur í sér að skilanefnd Glitnis, fyrir hönd kröfuhafa, á þess kost að eignast 95% hlutafjár í Íslandsbanka fyrir 30. september næstkomandi eða fá greiðslu í formi skuldabréfs, útgefnu af Íslandsbanka, og kauprétti á allt að 90% af hlutafé í bankanum á árunum 2011 til 2015.

„Ég er afar ánægð með að samningar séu í höfn enda um mikilvægan áfanga í uppbyggingu íslenska fjármálakerfisins að ræða.  Nú eiga kröfuhafar eftir að ákveða hvort þeir eignist bankann strax eða hvort þeir fái greiðslu í formi skuldabréfs ásamt kauprétti á bankanum,“ segir Birna Einarsdóttir, bankastjóri Íslandsbanka, í tilkynningu frá bankanum. Birna segir báðar leiðirnar skapa Íslandsbanka trausta og spennandi framtíð.

Núverandi stjórnarmenn munu sitja áfram í stjórn bankans. Í stjórn bankans sitja: Vilhjálmur H. Vilhjálmsson, formaður, Guðmundur R. Jónsson, Katrín Ólafsdóttir, Martha Eiríksdóttir og Ólafur Ísleifsson.