Gistinóttum fækkar

Gistinætur á hótelum í júní síðastliðnum voru 147.900 en voru 155.800 í sama mánuði árið 2008. Þetta kemur fram hjá Hagstofunni og segir einnig að gistinóttum hafi fækkað í öllum landshlutum nema á Suðurlandi. Á Norðurlandi voru gistinætur svipaðar milli ára.

Samkvæmt tölunum fækkaði gistinóttum hlutfallslega mest á samanlögðu svæði Suðurnesja, Vesturlands og Vestfjarða, úr 14.700 í 12.300 eða um 17 prósent. Gistinóttum fækkaði einnig á Austurlandi úr 8.500 í 7.500 eða um rúm 12 prósent. Á höfuðborgarsvæðinu fækkaði gistinóttum um tæp 6%, úr 99.400 í 93.700. Á Norðurlandi voru gistinætur svipaður milli ára eða um 14.600.

Þá er bent á að Suðurland er eini landshlutinn þar sem fjölgun gistinátta varð á milli ára. Þar fóru gistinætur úr 18.500 í 19.800 sem er um 7 prósenta aukning.

Minnkandi hótelnotkun Íslendinga er skýringin á þessu en gistinóttum fækkaði um tæp 11 prósent milli ára meðal Íslendinga en fjöldi gistinátta erlendra ríkisborgara jókst um 4 prósent að því er segir á vef Hagstofunnar.

Ef litið er til fyrstu sex mánaða ársins kemur fækkun einnig í ljós en gistinóttum fækkaði á því tímabili um tæp þrjú prósent miðað við sama tímabil árið á undan. „Gistinætur fyrstu sex mánuði ársins voru 568.300 en voru 584.300 á sama tímabili árið 2008," segir einnig í tilkynningu Hagstofunnar og er fjölgun á Suðurlandi um átta prósent og um þrjú prósent á Norðurlandi.

Á öllum öðrum landsvæðum fækkaði gistinóttum, mest á Austurlandi um 18 prósent. „Fyrstu sex mánuði ársins fækkaði gistinóttum Íslendinga um 13% en gistinóttum erlendra ríkisborgara fjölgaði um 1% miðað við sama tímabil árið 2008," segir að lokum í tilkynningu Hagstofunnar.