Straumur biður um rannsókn

Straumur óskar eftir því að Seðlabanki og Fjármálaeftirlit skoði gjaldeyrisviðskipti bankans. Starfsmenn hafa orðið fyrir áreiti vegna ásakana um brot á gjaldeyrisreglum.

Straumur hefur farið þess á leit við Fjármálaeftirlitið og Seðlabankann að gjaldeyrisviðskipti bankans verði tekin til skoðunar og hefur látið allar upplýsingar um viðskiptin í hendur eftirlitsaðila.

Bankinn er sakaður um að hafa keypt gjaldeyri á yfirverði af útflutningsfyrirtækjum bæði beint og óbeint í gegnum útibú hans erlendis og ekki skilað inn í landið eins og gjaldeyrisreglur Seðlabankans um skilaskyldu gjaldeyris, sem Alþingi samþykkti í lok nóvember í fyrra, kveða á um. Viðskiptin hafi komið í veg fyrir eðlilega styrkingu krónunnar.

„Starfsfólk Straums hefur orðið fyrir áreiti af völdum þessara ásakana,“ segir Georg Andersen, framkvæmdastjóri upplýsingasviðs Straums. Áreitið tengist að nokkru leyti grun um að bankinn haldi gengi krónu lágu en ekki síst því að Björgólfur Thor Björgólfsson er stjórnarformaður bankans og umsvifamestur hluthafa.

William Fall, forstjóri Straums, segir í tilkynningu ásakanir í garð bankans alrangar enda hafi hann ávallt unnið samkvæmt reglunum. „Við höfum engu að leyna,“ segir hann.

Straumur bendir á að bankinn hafi keypt gjaldeyri fyrir 4,5 milljarða króna frá því gjaldeyrisreglurnar voru samþykktar, þar af hafi um helmingur gjaldeyrisviðskipta átt sér stað utan landsteina, svo sem við sænska bankann SEB Enskilda og í gegnum skrifstofu Straums í Lundúnum í Bretlandi.

Viðskipti sem eiga sér stað erlendis við erlendan eiganda gjaldeyris og koma aldrei hingað til lands eru ekki skilaskyld.

Málið verður tekið til skoðunar, samkvæmt upplýsingum frá Fjármálaeftirlitinu.

Eftir því sem næst verður komist úr bankageiranum eru viðskipti Straums innan ramma laganna. Upphæðirnar sem um ræði séu lágar og hreyfi ekki gengi krónunnar nema að litlu leyti, hugsanleg áhrif séu innan við eitt prósent.

Mál manna er að framboð og eftirspurn ráði mun meiru um hreyfingar krónunnar. Innflutningsfyrirtæki þurfi gjaldeyri til greiðslu á vörum auk þess sem ýmsir innlendir aðilar hafi keypt gjaldeyri til greiðslu lána. Þá sé beinlínis fátt sem hvetji útflutningsfyrirtæki til að skila gjaldeyri heim. Nýti þau hann fremur til rekstrar erlendis.jonab@markadurinn.is