Útilokar ekki Facebook siðareglur blaðamanna

„Það er alveg umhugsunarefni að blaðamenn eigi að setja sér einhverjar siðareglur hvað svona varðar," segir Þóra Kristín Ásgeirsdóttir, formaður Blaðamannafélags Íslands, um tilvitnanir í Facebook síður fólks.

Sífellt algengara verður, bæði í fjölmiðlum hér á landi og erlendis, að fjölmiðlar noti upplýsingar af Facebook og öðrum samskiptavefjum við vinnslu frétta.

Þóra segir ekki hafa verið rætt um viðmiðunarreglur í þessu sambandi í Blaðamannafélaginu, en hins vegar geti vel verið að félagið þurfi að taka upp þessa umræðu og taka mið af henni í reglum sínum.

„Sjálf mundi ég miða við síður sem eru stilltar sem opnar, eða eru á forræði opinberra persóna með breiðan vinahóp, jafnvel þúsund eða fleiri. Svo má spyrja sig hvort ekki sé eðlilegt að leita samþykkis fyrir birtingu," segir Þóra.

Hún segir almennu reglu blaðamanna um að virða ákveðin landamæri og friðhelgi einkalífsins eiga við Facebook líka. Þegar fólk sé að flagga skoðunum sínum á opnum síðum þá sé það þó tæpast leyndarmál.

Bæði yfirvöld og fjölmiðlar erlendis hafa gripið til þess að setja fjölmiðlafólki viðmiðunarreglur um notkun upplýsinga af Facebook.

Siðanefnd breskra fjölmiðla sendi til dæmis í síðasta mánuði frá sér álit í Facebook máli. Í leiðbeiningum nefndarinnar til fjölmiðla segir ásættanlegt að birta upplýsingar af samskiptavefjum í ákveðnum tilfellum, þrátt fyrir að þær séu ætlaðar þröngum hópi fólks.

Það sé yfirleitt þegar viðkomandi vekur almenna athygli vegna eigin gjörða, eða þegar upplýsingarnar skipta máli vegna einhvers sem er í þjóðfélagsumræðunni þegar viðkomandi má búast við að kastljós fjölmiðla beinist að sér.

Séu lokaðar síður notaðar til að afla upplýsinga þurfi almannahagsmunir að réttlæta birtingu þeirra.