Segist fá 3,3 milljónir í laun á ári

Jón Ásgeir Jóhannesson situr áfram í stjórnum tveggja breskra félaga þrátt fyrir að þau hafi verið sett í greiðslustöðvun og skilanefnd Landsbankans hafi gengið að veðum í þeim. Fyrir stjórnarsetuna segist hann fá þrjú hundruð þúsund krónur í mánaðarlaun.

Skilanefnd Landsbankans gekk að veðum í BG Holding, dótturfyrirtækis Baugs í Bretlandi í síðustu viku eftir að farið hafði verið fram á greiðslustöðvun fyrirtæksins í Bretlandi. Veðin sem bankinn gekk að eru í fjórum fyrirtækjum en þeirra á meðal eru verslunarkeðjan Hamleys og matvöruverslanirnar Iceland.

Með þessu vildi bankinn tryggja að ekki væri hægt að ráðstafa fjárfestingum BG Holding án þess að haft yrði samráð við Landsbankann.

Skilanefnd Landbankans samdi við stjórnendur fyrirtækjanna að sitja þar áfram þrátt fyrir þetta. Páll Benediktsson, upplýsingafulltrúi skilanefndarinnar, segir að þetta hafi verið gert til að raska sem minnst við rekstrinum. Jón Ásgeir Jóhannesson hefur setið í stjórn Hamleys og Iceland og mun hann því gera það áfram og fá laun fyrir það.

Breski vefmiðillinn This is Money fullyrti í dag að Jón Ásgeir fengi fyrir þetta 3,3 milljónir í laun á mánuði og bifreið og þyrlu til afnota. Þetta segir Jón Ásgeir langt frá sannleikanum. Hann fái greitt þrjár og hálfa milljón króna á ári fyrir stjórnarstörf sín eða tæplega þrjú hundruð þúsund krónur á mánuði. Hann fái engin fríðindi, bíl eða annað slíkt.

Þegar óskað var eftir greiðslustöðvun í fyrirtækjunum voru tilnefndir tveir breskir tilsjónarmenn frá endurskoðendaskrifstofunni Price Waterhouse Coopers. Þeirra hlutverk verður að fylgjast með því að allt gangi eðlilega í rekstri fyrirtækjanna en þeir geta breytt stjórnum þeirra eða gert athugasemdir við reksturinn. Jón Ásgeir segir það því í raun í þeirra höndum hversu lengi hann kemur til með að sitja í stjórnunum.

Jón Ásgeir fékk þriggja mánaða skilorðsbundinn dóm í Baugsmálinu síðasta sumar en það þýddi að hann má ekki sitja í stjórnum fyrirtækja hér á landi í þrjú ár. Í framhaldinu sagði hann sig úr stjórnum fyrirtækja hér á landi. Hann getur hins vegar setið í stjórnum erlendis þar sem önnur lög gilda þar. Hjá skilanefnd Landsbankans fengust þær upplýsingar í dag að nefndin hefði ekki skoðað neitt sérstaklega hvort að dómurinn hafi áhrif á áframhaldandi stjórnarsetu hans í bresku félögunum tveimur.