Endar Giggs ferilinn með Cardiff?

Ryan Giggs átti stórleik fyrir Manchester United um helgina þegar liðið vann stórsigur á Chelsea 3-0. Giggs útilokar það ekki að klára feril sinn með Cardiff City en Giggs ólst upp í Cardiff.

„Ég fylgist vel með gengi Cardiff City þar sem félagið er frá heimabæ mínum," sagði Giggs í viðtali við dagblað í Wales. Cardiff er sem stendur í fimmta sæti 1. deildar (B-deildarinnar).

„Ég vona að þeir komist í úrvalsdeildina. Ég hef oft verið spurður að því hvort ég gæti hugsað mér að enda ferilinn með Cardiff. Samningur minn rennur út í maí svo við skulum bíða og sjá. Sem stendur hafa engar viðræður átt sér stað um nýjan samning," sagði Giggs.

Peter Ridsdale, stjórnarformaður Cardiff, sagði þetta um málið: „Sú staðreynd að fólk trúir því að við getum fengið leikmann eins og Ryan Giggs sýnir það skýrt hve miklar framfarir hafa orðið hjá félaginu undanfarin ár."