Fjárfestar sækja í ríkistryggð skuldabréf

Sókn fjárfesta í ríkistryggð skuldabréf er mikil þessa dagana, hvort sem um er að ræða skammtímapappíra eða langtímabréf.

Fjallað er um málið í Morgunkorni greiningar Glitnis. Þar segir að sér í lagi virðist endurkoma ríkisvíxla inn á markað hafa verið vel til fundin, ef marka má viðbrögð á markaði. Viðtökur voru ágætar yfir það heila í útboðum Seðlabankans á ríkisskuldabréfum á föstudag.

Eftirspurn eftir 3ja mánaða ríkisvíxlum reyndist nærri tvöföld miðað við áætlað framboð. Var tekið tilboðum fyrir 30 milljarða kr., líkt og stefnt hafði verið að, og voru flatir meðalvextir í útboðinu 15,43%. Hlýtur það að teljast vel ásættanlegt fyrir ríkissjóð, enda nokkru lægri vextir en í desemberútboði Seðlabankans.

Áhugi fjárfesta á útboði ríkisbréfa á föstudag voru nokkuð mismunandi eftir flokkum. Þannig reyndist áhugi á tveggja ára ríkisbréfunum fremur takmarkaður. Alls bárust tilboð að fjárhæð 9,2 milljarða kr. í flokkinn og var tilboðum tekið fyrir ríflega 6,3 milljarða kr., en áætlað hafði verið að taka tilboðum fyrir allt að 10 milljarða kr. í þessum flokki.

Kemur dræmur áhugi nokkuð á óvart, enda höfðu viðskipti með flokkinn verið lífleg dagana á undan og krafa hans lækkað verulega.

Betur farnaðist í útboði lengstu ríkisbréfaflokkanna tveggja. Þar var tilboðum tekið fyrir tæplega 10 milljarða kr., í samræmi við áætlun Seðlabankans fyrir útboðið.