Norskir þingmenn kynna sér starfsemi LÍÚ

Um 20 manna hópur þingmanna norska Stórþingsins sótti höfuðstöðvar LÍÚ heim í morgun. Heimsóknin var hluti af dagskrá þingmannanna í ferð þeirra til Íslands.

Í frétt um málið á vefsíðu LÍÚ segir að Inge Lønning, þingmaður Hægriflokksins og forseti neðri deildar Stórþingsins, hafði enda á orði að lærdómsríkt væri að upplifa það umrót sem nú ríkti í íslensku þjóðlífi. „Við gætum ekki hafa tímasett ferð okkar betur hvað þetta varðar," sagði hann.

Friðrik J. Arngrímsson, framkvæmdastjóri LÍÚ, hélt stutt erindi þar sem hann fræddi hina norsku gesti um starfsemi og hlutverk Landsambands íslenskra útvegsmanna áður en hann útskýrði andstöðu LÍÚ við aðild að Evrópusambandinu í nokkuð ítarlegu máli.

Hann fékk margar fyrirspurnir frá Norðmönnunum. Þar í landi eru málefni ESB vel þekkt eftir að aðild að sambandinu var tvívegis felld í þjóðaratkvæðagreiðslu.