Íslenskir neytendur hafa aldrei verið jafn svartsýnir

Íslenskir neytendur eru afar svartsýnir um þessar mundir, enda leggjast á eitt ótíðindi úr efnahagslífinu, ört vaxandi atvinnuleysi og órói í stjórnmálunum. Hefur væntingavísitala Gallup aldrei verið lægri en nú.

Greining Glitnis fjallar um málið í Morgunkorni sínu. Þar segir að Capacent Gallup birti í morgun Væntingavísitölu (VVG) fyrir janúar. Skemmst er frá því að segja vísitalan fór nú í sitt lægsta gildi frá upphafi, 19,5 stig, en áður hafði hún lægst farið í 23,2 stig í nóvember síðastliðnum. 94% svarenda telja núverandi ástand slæmt en 0,2% telur það gott.

Væntingar til næstu sex mánaða lækka einnig talsvert, og telja nú ríflega 65% svarenda að ástandið verði verra að hálfu ári liðnu, en tæp 14% svarenda telja að það verði betra. Allar undirvísitölur lækka milli mánaða.

Vert er að hafa í huga að svörum fyrir VVG er safnað í fyrri hluta hvers mánaðar, og nær mælingin nú því ekki til síðustu viku þegar sem mest gekk á í stjórnmálunum hér á landi.