Leyndardómur Mylluseturs afhjúpaður: Róbert stærsti hluthafinn

Salt Investment, félag Róberts Wessman, verður stærsti hluthafinn í Myllusetri, nýstofnuðu útgáfufélagi Viðskiptablaðsins. Róbert staðfesti þetta í samtali við Vísi en mikil leynd hefur ríkt yfir hluthafahópnum frá því að félagið var stofnað í lok nóvember á síðasta ári.

Félag Róberts mun eiga 40% í Myllusetri og sagði Róbert að aðeins ætti eftir að ganga frá formsatriðum vegna kaupa á útgáfunni.

Haraldur Johannessen, ritstjóri Viðskiptablaðsins, hefur verið þögull sem gröfin varðandi eigendahóp Mylluseturs. Heimildir Vísis herma að Haraldur eigi 10% í félaginu. Auk þess herma heimildir Vísis að Guðbjörg Matthíasdóttir hafi skráð sig fyrir 30% hlut í félaginu. Það gæti þó breyst því Guðbjörg hefur ásamt hópi fjárfesta lýst yfir áhuga á því að eignast Árvakur, útgáfufélag Morgunblaðsins. Fari svo að Guðbjörg eignist Árvakur getur hún ekki átt í Myllusetri vegna skilyrða Glitnis um að kaupendur Árvakurs eigi ekki hlut í öðrum fjölmiðlum.